Berkjuspeglun er fljótleg og örugg rannsókn. Hún er framkvæmd af lungnalækni og er notast við mjóa slöngu sem í er ljósleiðari sem tengdur er við sjónvarpsskjá. Eftir staðdeyfingu er slöngunni rennt niður í berkjur um nef eða munn. Berkjurnar eru síðan skoðaðar að innanverðu og reynt að ná sýni úr hnútnum í lunganu.
Stundum getur reynst erfitt að greina hvort stakur hnútur í lunga sé krabbamein eða góðkynja fyrirferð. Í slíkum tilvikum getur jáeindaskanni (e. PET) verið hjálplegur. Sérstöku merkiefni er þá sprautað í æð sjúklingsins og upphleðsla þess í hnútnum og annars staðar í líkamanum könnuð. Jáeindaskanni er ekki til hér á landi, en hægt er að senda sjúklinga til Kaupmannahafnar þurfi að gera rannsóknina.
![Berkjuspeglun](http://lungnakrabbamein.is/wp-content/uploads/2012/05/Screen-Shot-2012-05-23-at-4.50.17-PM-525x298.png)
Berkjuspeglun